العترة بتصلح المشية في أمثال سودانية كثيرة بنسمعها من الأمهات والجدات ونضحك عليها أحيانا لكن مع الزمن بنكتشف إن الكلام البسيط ده وراه تجارب كبيرة
العترة بتصلح المشية زمان لما كنا نسمع المثل السوداني العترة بتصلح المشية كنا نسمعه ونمشي لكن يمكن ما كنا فاهمين المعنى الحقيقي ورا الكلام كبرنا وفهمنا إن العترة ما شرط تكون وقعة في الشارع ممكن تكون زول وثقنا فيه وطلع ما زي ما كنا فاكرين وممكن تكون قرار استعجلنا فيه وبعدها دفعنا ثمنه وممكن تكون كلمة قلناها وما حسبنا حساب أثرها على زول تاني الحياة فيها عثرات كثيرة وبعضها بسيط بنقوم منه ونواصل عادي وبعضها بخلينا نقف فترة ونسأل نفسنا كيف وصلنا هنا لكن خلونا نكون صريحين مع المثل مش كل عترة بتصلح المشية مرات العترة ممكن تخليك تقع وتكسر رجلينك وتحتاج زمن عشان تقوم من جديد ومرات ممكن تخليك تخاف من المشي نفسه وهنا الفرق بين الإنسان والتجربة في زول يقع ويتعلم وفي زول يقع ويقوم ويكرر نفس الخطوة وفي زول تاني يقرر إنو ما يمشي تاني خوفا من الوقوع أنا شايفة إن المشكلة ما في العترة ذاتها المشكلة في الحاصل بعدها هل وقفنا وراجعنا نفسنا هل عرفنا وين غلطنا هل اتعلمنا من الناس والمواقف ولا كل مرة بنقول الدنيا ظلمتنا والناس ما كويسة والحظ واقف ضدنا أحيانا العترة بتكشف لينا حاجات ما كنا شايفنها بتكشف لينا شخصيات وبتكشف لينا ضعف فينا نحن وبتخلينا نعيد حسابات كثيرة يمكن عشان كده أجدادنا قالوا العترة بتصلح المشية لأن الإنسان بعد التجربة ما مفروض يمشي بنفس الطريقة القديمة لكن برضو ما مفروض نخلي تجربة واحدة سيئة تخلينا نفقد ثقتنا في كل الناس ولا نخلي خسارة واحدة تقنعنا إن كل الطرق نهايتها خسارة نقع ونقوم نتعلم ونواصل ولو كسرنا رجلنا نقعد شوية لحدي ما نتعافى وبعدها نمشي براحة لكن المهم ما نرجع لنفس الحفرة ونحن عارفين إنها هناك العترة ممكن تصلح المشية فعلا لكن المشية في النهاية مسؤوليتنا نحن
