ليس بالضغط وحده يبقى الغربال !
خلونا الليلة نقعد تحت شدرة حوشنا، نتونس معاكم
بلغة حبوبتي رضينة، ونشرب سوا شاي خالتي عرفة الكارب ومنعنع.
أها، مع الونسة دخلنا على ناس الفيس، لقينا الدنيا مقلوبة والأسافير ما عندها سيرة غير الغربال، والناس منقسمين انقسام يكفي لقيام مؤتمر قمة! فريق شايف الغربال «ما زال هو الحل»، وفريق تاني شايف إنو الحل بقى محتاج لي حل!
وبعيداً عن العاطفة، وعن «ده كابتننا وما بنقدر نقول ليهو اقعد كنبة»، خلونا نتكلم بعقل الهلال ومصلحته.
ما في زول ممكن ينكر قيمة الغربال ولا العطاء القدمو للهلال. الراجل كابتن وهداف وصاحب تاريخ، ومرّ بفترات كان فيها من أخطر المهاجمين في السودان. وتألقه مع المريخ كان من الأسباب الخلت الهلال يرجعو.
لكن يا جماعة الخير... الكورة ما عندها ذاكرة! الكورة بتسأل سؤال: هسي إنت قاعد تعمل شنو جوه الميدان؟ بتجيب أقوان ولا بتتفرج زي ناس ود حمدتو وشيخ جلال؟
الغربال زمان كان بيضغط وبيتحرك وبيزعج المدافعين، لكن فوق كل ده كان بيجيب قون. أما هسي، بقى الضغط ذاته إنجاز نحتفل بيهو ونبرر بيهو مشاركة الغربال!
يا أخي نحن ما محتاجين مهاجم وظيفتو الرسمية «مطاردة المدافعين»! عايزين زول يضغط ويجيب أهداف. القميص رقم 10 ما مكتوب عليهو «خاص بالضغط والمطاردة»، مكتوب عليهو: يا تجيب قون يا ألبس جلابية سيف كرار وتعال الاستراحة نتفرج على ناس سامورا وفلومو!
الهلال عندو طموحات أفريقية كبيرة، وجمهورو ما داير مشاركة. الهلال داير يمشي بعيد، والهدف الأكبر عند الأهلة هو الكأس. وفي أفريقيا، الفرصة البتجيك ما بتقول ليك: «أرجع ليك بعد شوية». الفرصة بتجي مرة، ولو ضيعتها ممكن تلقى نفسك في أم درمان بتاكل تسالي مع عطالة التمهيدي... معليش، أنا نسيت الجماعة تأهلوا!
عشان كده وجود صنداي وفلومو وغيرهم من المهاجمين في الدكة بيفرض سؤال بسيط: الجاهز يلعب ولا الاسم يلعب؟
وبرضو خلونا نكون منصفين. الغربال ما مطلوب منو يعتزل، ولا الهلال بيتنكر لكباتنو. المطلوب إنو الجهاز الفني يتعامل معاه كلاعب، وليس كرمز لا يمكن لمسه. لو الحل في الكنبة، فالكنبة ماهلة ومريحة، ولو في معالج نفسي د. بكري فالح تعريفة منكم ما بشيلها، ولو الحل في البل، نكلم فارس يديهو بدلة تدريب في الرديف.
يا جماعة، ما شايفين أسطورة الكرة كريستيانو، بتاريخه وهيبته، يتعرض لنقد عنيف من جماهير النصر؟ الدون وصل مرحلة الكرة تمر من أمامه وما يلحق بيها، لأنو تقدم بيهو العمر، والكورة ما بتعرف «يمه أرحميني»!
جملة أخيرة:
الغربال لاعب كبير وكابتن محترم، لكن الهلال أكبر من أي لاعب. لو محتاج يقعد شوية، يقعد، يستعيد حساسيته وثقته ولياقته، ويطلع لينا الغربال البنعرفو. غير كده... يفتح الله.
